President’s Corner
।मराठा तितुका मेळवावा।
आम्ही मराठी, हीच आमची Unity!
MMC ची एक Team आणि एक Community!
नमस्कार मंडळी!
नवीन वर्ष सुरू झालं आहे. सर्वप्रथम महाराष्ट्र मंडळाच्या २०२३ च्या नव्या कार्यकारिणीच्या वतीने तुम्हा सर्वाना नव्या वर्षाच्या शुभेच्छा देतो. हे नवीन वर्षं तुम्हाला सुख-समृद्धीचं, समाधानाचं आणि आरोग्यदायी जावो. नव्या वर्षात तुमच्यासाठी नव्या उत्साहाने, नवनवीन आणि भरगच्च कार्यक्रम करण्यासाठी २०२३ ची कार्यकारिणी सज्ज आहे.
अनेकोत्तम दर्जेदार सांस्कृतिक कार्यक्रम, सुग्रास भोजन, गप्पा-टप्पा याची रेलचेल यावर्षीही असेलच. खरं म्हणजे, या नव्या वर्षी अपेक्षा अशी होती, की आपला पहिला मकर संक्रांतीचा कार्यक्रम आपल्याच मंडळातील लोकांनी बसवावा. परंतु काही अपरिहार्य कारणामुळे ते नाटक होणार नाही. पण आता DFW Theatrons, त्यांच्या दोन उत्कृष्ट कलाकृती घेउन येत आहेत. महाराष्ट्र मंडळ शिकागोच्या संकेत स्थळावर (website) या कार्यक्रमाची सविस्तर माहिती उपलब्ध आहे. हा वैविध्यपूर्ण कार्यक्रम यशस्वी होईल अशी आम्हाला खात्री आहे. हा कार्यक्रम पाहण्याच्या संधीचा जरूर लाभ घ्या. उर्वरित वर्षासाठी गुढी पाडवा, गणेशोत्सव, दिवाळी, वार्षिक सहल (Picnic), दांडिया/गर्बा, क्रीडा महोत्सव (स्पोर्ट्स) नक्कीच होतील.
या नव्या कार्यक्रमात शिकागो परिसरातल्या सर्व सदस्यांना (members) भाग घेता यावा म्हणून महाराष्ट्र मंडळाची कार्यकारिणी अधिक विस्तारित केली आहे. कार्यकारी समितीमध्ये उत्तेरच्या आणि दक्षिणेच्या सदस्यांचा कटाक्षाने अंतर्भाव केला आहे. कार्यकारी समितीचे उत्तर आणि दक्षिण अशा दोन्ही बाजूंच्या उपनगरांमधले सदस्य मंडळाचे विविध कट्टे, आणि उपक्रम यांचे संपर्काधिकारी (Liaison) म्हणून काम करतील याची विशेष दक्षता आम्ही घेतो आहोत. यामुळे दक्षिणेबरोबर शिकागो शहराच्या उत्तरेकडील उपनगरातील सदस्यांना कार्यक्रमात सक्रिय सहभाग घेणं सोपं होईल.
महाराष्ट्र मंडळाच्या आजवरच्या इतिहासात कधीही न झालेले अनेक नवे उपक्रम (साहित्य कट्टा, अध्यात्मपीठ, आम्ही सारे गवय्ये, इतिहास मंच, भ्रमणगाथा, आरोग्यधाम, अर्थविचार) आम्ही २०२१-२०२२ मध्ये चालू केले. तुम्हा सर्वांचा मोठ्या संख्येने सक्रिय सहभाग या उपक्रमांना लाभला आणि ते लोकप्रिय ठरले. हे जुने उपक्रम आम्ही या वर्षीही चालू ठेवूच, पण त्यांच्या यशापासून प्रेरणा घेऊन आम्ही तीन नवीन उपक्रम या वर्षी चालू करणार आहोत. बागकाम (Gardening) या विषयात रस असणाऱ्यांसाठी ‘शिकागोची बाग’ हा नवीन WhatsApp कट्टा लवकरच सुरू होईल. तसंच आरोग्यसंवर्धन हा उद्देश समोर ठेवून ‘Fitness Club’ हा एक नवा WhatsApp कट्टा आम्ही सुरू करणार आहोत. समाजकार्य करण्यासाठी ‘Community Services’ हाही कट्टा लवकरच सुरू होईल. या तिन्ही कट्टायांविषयी अधिक माहिती येत्या काही दिवसात आम्ही तुम्हाला देऊ.
शिकागोजवळ स्थायिक असलेल्या सर्व मराठी आणि महाराष्ट्रीय लोकांना एकत्र आणायचा आमचा प्रयत्न राहील. महाराष्ट्र मंडळाच्या कार्यक्रमांचं यश हे तुमचं म्हणजे मंडळाच्या सदस्यांचं यश आहे. मंडळाच्या कार्यक्रमाचं यश अधिक वाढावं यासाठीच्या तुमच्या नवीन कल्पनांचं आम्ही स्वागत करू. महाराष्ट्र मंडळाची कार्यकारिणी प्रयत्न करेलच पण कार्यक्रम यशस्वी होण्यासाठी तुमचा सहभाग आणि आशीर्वाद आवश्यक आहे. गेल्या वर्षीच्या तुम्ही सर्वांनी सर्व उपक्रमांमध्ये मोठ्या संख्येने सहभागी होऊन महाराष्ट्र मंडळाला पाठिंबा दिलात. महाराष्ट्र मंडळावरचा तुमचा स्नेह, लोभ या नव्या वर्षीही राहावा, किंबहुना अधिक वृद्धिंगत व्हावा अशी अपेक्षा करतो आणि माझं मनोगत इथेच पूर्ण करतो.
धन्यवाद! लवकरच प्रत्यक्ष भेट होईल, या आशेसह,
आपलाच,
प्रसाद अथणीकर
अध्यक्ष, महाराष्ट्र मंडळ शिकागो २०२३
अध्यक्ष, महाराष्ट्र मंडळ शिकागो २०२३
